திருச்சியில் ஒரே இடத்தில் பிடிபட்ட 10 அடி நீள இரண்டு மலைப்பாம்புகள்.

திருச்சி மாவட்டம் துவரங்குறிச்சி அடுத்த கஞ்சநாயக்கன்பட்டி கிராமத்தில் தங்கம் என்பவரது தோட்டத்தின் அருகே பழனிச்சாமி என்பவரது ஆடுகள் மேய்ந்து கொண்டிருந்தன. அப்பொழுது ஆடுகள் கத்தும் சத்தம் கேட்டு அருகே சென்று பார்த்த போது 10 அடி நீளம் கொண்ட இரண்டு மலைப்பாம்புகள் கிடந்துள்ளன.

அதில் ஒரு மலைப்பாம்பு ஒரு ஆட்டுக்குட்டியை விழுங்கிய நிலையில் கிடந்தது. மற்றொரு மலைப்பாம்பு அதன் அருகிலேயே இருந்தது. இதனை கண்ட பழனிச்சாமி உடனடியாக துவரங்குறிச்சி தீயணைப்பு துறையினருக்கு தகவல் தெரிவித்தார்.

பின்னர் தீயணைப்பு நிலைய அலுவலர் மனோகர் மற்றும் சிறப்பு நிலைய அலுவலர் நாகேந்திரன் தலைமையிலான தீயணைப்பு வீரர்கள் சம்பவ இடத்திற்கு சென்று இரண்டு மலைப்பாம்புகளையும் லாவகமாக பிடித்தனர். பிடிக்கப்பட்ட இரண்டு மலைப்பாம்புகள் வனத்துறையினரிடம் ஒப்படைக்கப்பட்டது.