திருச்சி: மாவட்ட அளவிலான ரோலர் மற்றும் இன்லைன் ஹாக்கி சாம்பியன்ஷிப் 2025 கோலாகலம்!

திருச்சி மண்டல ரோலர் ஸ்கேட்டிங் அசோசியேஷன் (TRRSA) சார்பில், மாவட்ட அளவிலான ரோலர் மற்றும் இன்லைன் ஹாக்கி சாம்பியன்ஷிப் 2025 போட்டி கோலாகலமாக நடைபெற்றது. ஜல்லிக்கட்டு சாலையில் உள்ள ரோலர் ஸ்கேட்டிங் மைதானத்தில் செப்டம்பர் 6 முதல் 9 வரை நடைபெற்ற இந்த நிகழ்வில், பல்வேறு பிரிவுகளிலிருந்து நூற்றுக்கணக்கான வீரர், வீராங்கனைகள் பங்கேற்று தங்கள் திறமைகளை வெளிப்படுத்தினர்.

இந்த ஆண்டு போட்டியை, சிறப்பு விருந்தினர்கள் திருமதி. மாஹீன் பாத்திமா (BVM குளோபல் பள்ளி, திருச்சி முதல்வர்), திரு. ஞான சுசிகரன் (தூய யோவான் ஆலயம் ஆங்கிலோ இந்திய மேல்நிலைப்பள்ளி, திருச்சி கடித தொடர்பாளர்) மற்றும் திரு. எஸ். தனசேகரன் (ANU TLE, திருச்சி மற்றும் விராலிமலை தலைவர்) ஆகியோர் தொடங்கி வைத்தனர்.

போட்டியில், ரோலர் மற்றும் இன்லைன் ஹாக்கி என இரண்டு பிரிவுகளிலும் தனித்திறன் மற்றும் குழுப் போட்டிகள் நடத்தப்பட்டன. வயதுப் பிரிவுகளுக்கேற்ப நடைபெற்ற இந்த போட்டிகளில், வீரர்களின் அசாத்திய திறமைகள் பார்வையாளர்களை வியக்க வைத்தன. நான்கு நாட்கள் நடைபெற்ற இந்த போட்டிகளின் முடிவில், வெற்றி பெற்ற வீரர்களுக்குப் பரிசுகள் மற்றும் சான்றிதழ்கள் வழங்கப்பட்டன.

TRRSA மற்றும் தமிழ்நாடு ரோலர் ஸ்கேட்டிங் அசோசியேஷன் (TNRSA) சார்பாக, பங்கேற்ற அனைத்து வீரர்களுக்கும் வாழ்த்துகள் தெரிவிக்கப்பட்டதுடன், நிகழ்வைச் சிறப்பாக நடத்திய ஒருங்கிணைப்பாளர்களுக்கும் பாராட்டுக்கள் தெரிவிக்கப்பட்டன. இந்த சாம்பியன்ஷிப், திருச்சியில் ரோலர் ஸ்கேட்டிங் மற்றும் இன்லைன் ஹாக்கி விளையாட்டை மேலும் ஊக்குவிக்கும் ஒரு சிறந்த களமாக அமைந்தது.