திருச்சி சாலைப் பாதுகாப்புக்கு துரை வைகோ நான்கு கோரிக்கைகள்

எனது திருச்சி நாடாளுமன்றத் தொகுதியில், திருச்சி மாவட்டத்தில், சென்னை – மதுரை தேசிய நெடுஞ்சாலையில் அமைந்துள்ள மன்னார்புரத்தில் எனது தொகுதி மேம்பாட்டு நிதியில் பேருந்து நிறுத்த நிழற்குடை அமைய இருக்கும் இடத்தை மாநகராட்சி மற்றும் தேசிய நெடுஞ்சாலைத்துறை அதிகாரிகளுடன் நேற்று (28.11.2025) காலை 8:30 மணியளவில் நேரில் சென்று ஆய்வு செய்தேன்.

அப்போது, பொதுமக்களின் நீண்டகால கோரிக்கைகளையும், சாலைப் பாதுகாப்பு தொடர்பான அவசரத் தேவைகளையும் கருத்தில் கொண்டு, தேசிய நெடுஞ்சாலை துறை (NHAI) – திருச்சி திட்ட இயக்குனரிடம் நேரில் விளக்கமளித்தும்,  எழுத்துப்பூர்வமாகவும் இரண்டு முக்கியமான கோரிக்கை கடிதங்களை வழங்கினேன்.

அதன் விவரங்கள் பின்வருமாறு:
திருச்சி – தஞ்சாவூர் தேசிய நெடுஞ்சாலையில்,  பால்பண்ணை சந்திப்பில் உள்ள மேம்பாலத்தில் திசைகாட்டி பலகைகள் & பாதுகாப்பு இரும்பு வலைகள் (Protective Steel Mesh) அமைத்தல் சம்பந்தமாக: சென்னை – மதுரை தேசிய நெடுஞ்சாலையில் உள்ள பால்பண்ணை மேம்பாலத்தில் அமைந்துள்ள திசைகாட்டியை சுவரொட்டிகளால் முழுதாய் மறைக்கப்பட்டுவிட்டது. இதனால் வாகன ஓட்டிகள் குழப்பமடைகின்றனர். எனவே திருச்சி – தஞ்சாவூர் மற்றும் மார்க்கெட் சாலை இடங்களில்  தெளிவாக தெரியும் வகையில் புதிய திசைகாட்டி பலகைகளும், எதிர்காலத்தில் சுவரொட்டி ஒட்டுவதைத் தடுக்கும் வகையில் பாதுகாப்பு இரும்பு வலைகளை அமைக்கவும் கோரிக்கை விடுத்துள்ளேன்.

குடமுருட்டி பாலம் – பெட்டவாய்த்தலை NH-81 பகுதியில் பாதுகாப்பு மேம்பாடு குறித்து அவசர கோரிக்கை:
திருச்சி மாவட்டத்தில் மூன்றாவது அதிக உயிரிழப்பு மண்டலமாக உள்ள குடமுருட்டி பாலம் முதல் பெட்டவாய்த்தலை வரையிலான 23 கி.மீ. NH-81 பகுதியில் இந்த ஆண்டு மட்டும் 44 உயிரிழப்புகள் நிகழ்ந்துள்ளன. ஜூன் மாதம் ஒரு RTO அதிகாரியே உயிரிழந்த போதும் இப்பகுதியில் எந்தப் பாதுகாப்பு மேம்பாட்டுப் பணியும் தொடங்கப்படவில்லை. போதிய அகலமின்மை, ஆபத்தான வளைவுகள், சாலை பாதுகாப்பு குறியீடுகள் இல்லாதது போன்றவை தொடர்ந்து உயிரிழப்புகளுக்கு காரணமாக உள்ளன. எனவே விரிவான ஆய்வு நடத்தி, சாலை விரிவாக்கம், பாதுகாப்பு அம்சங்கள் மேம்படுத்தும் பணிகளை அவசர அவசியம் கருதி, உடனடியாகத் தொடங்கிட திட்ட இயக்குநர் அவர்களிடம் வலியுறுத்தியுள்ளேன்.

காலை 10:30 மணியளவில் திருச்சி கலெக்டர் அலுவலகத்தில் தேசிய நெடுஞ்சாலை துறை (NHAI) – தஞ்சை திட்ட இயக்குனரிடம் நேரில் எடுத்துரைத்து இரண்டு முக்கியமான கோரிக்கை கடிதங்களை வழங்கினேன்.

அதன் விவரங்கள் பின்வருமாறு:
பால்பண்ணை – துவாக்குடி சாலையில் பழுதடைந்த தெருவிளக்குகளை உடனே மாற்றிட வலியுறுத்தல்:
பால்பண்ணை – துவாக்குடி நெடுஞ்சாலைப் பகுதியில் பழுதான தெருவிளக்குகளை இன்னும் மாற்றவில்லை. கூடுதல் விளக்குகள் பொருத்தியது வரவேற்கத்தக்கது என்றாலும், ஏற்கெனவே பழுதடைந்தவை மாற்றப்படாமல் இருப்பது இரவு நேரத்தில் பெரும் பாதுகாப்பு ஆபத்தை ஏற்படுத்துகிறது. இது தொடர்பாக 22.09.2025 அன்று தஞ்சை திட்ட இயக்குனர் அவர்களை சந்தித்து மனுகொடுத்தும், 07.10.2025 அன்று கூட்டாய்வு நடத்தியும், இன்னும் அதற்கான பணிகள் தொடங்கப்படவில்லை. எனவே மண்டல அதிகாரி அவர்களிடம் உடனடி நடவடிக்கை கோரி மனு அளித்துள்ளேன்.

மஞ்சத்திடல் பேருந்து நிறுத்தத்தை உடனடியாக சீரமைக்க வைத்த வேண்டுகோளை ஏற்று சீரமைத்துக் கொடுத்தமைக்கு நன்றி!
திருச்சி – தஞ்சாவூர் நெடுஞ்சாலையில் உள்ள மஞ்சத்திடல் பேருந்து நிறுத்தம் அண்மையில் லாரி மோதி பெரிதும் சேதமடைந்திருந்தது. ஏற்கனவே எனது கோரிக்கையின் பேரில் NHAI சீரமைத்திருந்த நிலையில், தற்போது மீண்டும் பயன்படுத்த முடியாத நிலைக்கு தள்ளப்பட்டிருந்தது. இதுகுறித்து இரு நாட்களுக்கு முன் நான் வைத்த கோரிக்கையை ஏற்று, உடனடியாக மீண்டும் மறுசீரமைப்பு செய்து கொடுத்தமைக்கு நன்றி தெரிவித்துக் கொண்டேன்.

இந்த நான்கு கோரிக்கைகளும் பொதுமக்களின் வாழ்வாதார மற்றும் உயிர்ப் பாதுகாப்புடன் நேரடியாகத் தொடர்புடையவை. எனவே, அதிகாரிகள் உடனடியாக நடவடிக்கை எடுப்பார்கள் என நம்புகிறேன். மேலும், என் கோரிக்கைக்களுக்காக  மேற்கொள்ளப்பட்டுவரும் பணிகள் குறித்து தொடர்ந்து விசாரிப்பேன் என்பதையும் தெரிவித்துக்கொள்கிறேன் என்று கூறினார் துரை வைகோ.

திருச்சி விஷன் செய்திகளை வாட்ஸ் அப் மூலம் அறிய…
https://chat.whatsapp.com/D2QYeuCTbUyCt93oWlOAgF

டெலிகிராம் மூலமும் அறிய…. https://t.me/trichyvision
https://www.threads.net/@trichy_vision