கொலை வழக்கில் சம்மந்தப்பட்ட குற்றவாளிக்கு ஆயுள் தண்டனை வழங்கி தீர்ப்பு

திருச்சிராப்பள்ளி மாவட்டம், முசிறி காவல் நிலைய எல்லைக்குட்பட்ட, அங்காளம்மன் கோவில் தெருவை சேர்ந்த ரகுபதி (எ) ராம்கி 22/21, த.பெ. முருகேசன், சுண்ணாம்புகார தெரு, அழகுமணி, 34/21, த.பெ. ராஜீ, ஜீவனேஸ்வரன் (எ) கௌதம் 18/24. த.பெ.முருகானந்தம், பெரியார் நகர் ஆகிய மூவரும் நண்பர்களாக இருந்து வந்துள்ளனர்.

மேற்படி அழகுமணியின் தங்கை மகளை ரகுபதி (எ) ராம்கி மற்றும் ஜீவனேஸ்வரன் (எ) கௌதம் ஆகிய இருவரும் காதலித்ததாகவும், இதனை அறிந்த ரகுபதி அழகுமணியிடம் கூறி மேற்படி ஜீவனேஸ்வரனை எச்சரித்ததாகவும், தொடர்ந்து ஜீவனேஸ்வரன் (எ) கௌதம் மேற்படி பெண்ணை காதலிப்பதாக கூறிவந்ததால், ஆத்திரம் அடைந்த ரகுபதி (எ) ராம்கிமற்றும் அழகுமணி இருவரும் ஜீவனேஸ்வரனை கொலை செய்ய திட்டமிட்டு, கடந்த 16.02.2021 அன்று அழகுமணி தனது இருசக்கர வாகனத்தில் ஜீவனேஸ்வரனை அழைத்து கொண்டு முசிறி – சேலம் ரோட்டில் உள்ள பல்ல வாய்க்கால் ஓரத்திற்கு அழைத்துச் சென்று மது அருந்திய போது, ரகுபதி (எ) ராம்கி மறைத்து வைத்திருந்த இரும்பு பைப்பை பயன்படுத்தி ஜீவனேஸ்வரை கொலை செய்ததாகவும், இறந்து போன ஜீவனேஸ்வரனின் தாய் சங்கீதா 36/21 என்பவர் கொடுத்த புகாரின் அடிப்படையில் முசிறி காவல் நிலைய குற்ற எண்.94/2021, U/s 302 IPC @ 120(b), 364 IPC – ன் படி 17.02.2021 அன்று வழக்கு பதிவு செய்யப்பட்டுமேற்கண்ட எதிரிகள் ரகுபதி (எ)ராம்கி, அழகுமணி, ஆகியோரை கைது செய்து நீதிமன்ற காவலுக்கு அனுப்பபட்டது.

இவ்வழக்கின் விசாரணை திருச்சி இரண்டாவது கூடுதல் மாவட்ட நீதிமன்றத்தில் (II-ADJ) நடைபெற்று வந்தது.மேற்படி வழக்கில் அரசு தரப்பு வழக்கறிஞராக பாலசுப்பிரமணியன், ஆஜராகி வாதிட்டுவந்த நிலையில் இன்று (15.10.2025) திருச்சி இரண்டாவது கூடுதல் மாவட்ட நீதிமன்ற நீதிபதி கோபிநாத், (II-ADJ) அவர்கள் எதிரி-1 ரகுபதி (எ) ராம்கி 22/21, த.பெ. முருகேசன் என்பவருக்கு ஆயுள் தண்டனையும், ரூபாய்.1,000 அபராதமும் வழங்கியும், எதிரி-2 அழகுமணியை விடுதலை செய்தும் தீர்ப்பளித்துள்ளார்.

இந்நிலையில், இவ்வழக்கில் குற்றவாளிக்கு தண்டனை பெற்று தர நீதிமன்ற நடவடிக்கைகளை சரிவர கவனித்த முசிறி காவல் நிலைய நீதிமன்ற தலைமை காவலர்கள் கீர்த்திகா மற்றும் நடராஜ் என்பவர்களை திருச்சி மாவட்ட காவல் கண்காணிப்பாளர் செ.செல்வநாகரத்தினம், அவர்கள் வெகுமதி மற்றும் சான்றிதழ் வழங்கி பாராட்டியுள்ளார்.