திருச்சி மாநகர காவல் ஆணையர் ந.காமினி, திருச்சி மாநகரில் சட்டம் ஒழுங்கை பேணிக்காக்கும் வகையில் வழிப்பறி செய்யும் குற்றவாளிகள் மற்றும் அபாயகரமான ஆயுதங்களை வைத்திருக்கும் குற்றவாளிகள் மீது திருச்சி மாநகர காவல் துணை ஆணையர்கள் மற்றும் சரக உதவி ஆணையர்கள் சட்டரீதியான உரிய நடவடிக்கை எடுக்க அறிவுரை வழங்கியுள்ளார்.

கடந்த (21.05.2024)-ந் தேதி கோட்டை காவல் நிலைய எல்லைக்குட்பட்ட சத்திரம் பேருந்து நிலையம் அருகில் உள்ள ஒயின்ஷாப்பில் இரவு மது குடிக்க சென்ற நபரிடம் வீண் தகராறு செய்து, சட்டைபையில் வைத்திருந்த பணத்தை பறித்து கொண்டு, தப்பி செல்ல முயன்றவர்களை பிடிக்க முயன்ற நபரை அரிவாளால் தலை மற்றும் முகத்தில் வெட்டிவிட்டு தப்பி சென்றதாக பெறப்பட்ட புகாரின்பேரில் வழக்கு பதிவு செய்யப்பட்டு, விசாரணையில், மேற்கண்ட சம்பவத்தில் ஈடுப்பட்ட சிந்தாமணி, வென்னீஸ் தெருவை சேர்ந்த ரவுடி அபிஷேக் (20), த.பெ.மோகன் மற்றும் 3 நபர்களை கைது செய்து நீதிமன்ற காவலுக்கு அனுப்பி நடவடிக்கை எடுக்கப்பட்டுள்ளது.

மேலும், ரவுடி அபிஷேக் மீது ஸ்ரீரங்கம் காவல்நிலைய எல்லையில் கத்தியை காட்டி கொள்ளையில் ஈடுபட்டதாக 1 வழக்கும், கோட்டை காவல் நிலைய எல்லைக்குட்பட்ட பகுதியில் கத்தியை காட்டி பணம் பறித்ததாக ஒரு வழக்கு உட்பட 7 வழக்குகள் ஏற்கனவே பதிவு செய்யப்பட்டு விசாரணையில் இருப்பது தெரிய வந்தது. எனவே, ரவுடி அபிஷேக் என்பவர் தொடர்ந்து குற்ற நடவடிக்கைகளில் ஈடுபடுபவர் என விசாரணையில் தெரியவந்ததால், மேற்கண்ட எதிரியின் தொடர் குற்ற நடவடிக்கையை தடுக்கும் பொருட்டு கோட்டை காவல் ஆய்வாளர் கொடுத்த அறிக்கையினை பரிசீலனை செய்து, திருச்சி மாநகர காவல் ஆணையர் ந.காமினி, மேற்படி எதிரியை குண்டர் தடுப்பு காவல் சட்டத்தின்கீழ் கைது செய்ய ஆணையிட்டார்.

அதனை தொடர்ந்து திருச்சி மத்திய சிறையில் உள்ள எதிரி மீது பிறப்பிக்கப்பட்ட குண்டர் தடுப்பு சட்ட ஆணையினை சார்பு செய்து சிறையில் அடைக்கப்பட்டார். மேலும், திருச்சி மாநகரில் கத்தியை காண்பித்து வழிப்பறி குற்ற சம்பவங்களில் ஈடுபடுவோர் மீது கடுமையான நடவடிக்கை மேற்கொள்ளப்படும் என திருச்சி மாநகர காவல் ஆணையர் கடுமையாக எச்சரிக்கை விடுத்துள்ளார்.

#திருச்சி விஷன் செய்திகளை வாட்ஸ் அப் மூலம் அறிய... https://chat.whatsapp.com/EOjjjDwQWZa8HOTrrk6ttd

#டெலிகிராம் மூலமும் அறிய.... https://t.me/trichyvision

https://www.threads.net/@trichy_vision